性人君子(Don Jon)：Joseph處男執導，即玩III級

香港觀眾可能還未叫得出佢個名，不過相信一定會認得佢。

佢就係憑《心跳500天》冒起，做過《時凶獵殺》、《蝙蝠俠：夜神起義》及《林肯》等大片的Joseph Gordon-Levitt 。出身演藝世家，又鍾意演Indie的佢，今年自編自導自演了一齣電影叫《性人君子》(Don Jon)，於美國反應不俗，影評都幾好!

電影大約係講：鍾意睇AV又花心的Jon遇上100分靚女Barbara，不過Barbara原來係荷里活愛情片迷，一直希望男友要好似電影男主角咁完美，堅持要改造Jon仲唔俾佢再睇AV! 

起初睇以為係Hollywood一貫愛情小品，兩人鬥下氣最終都係Happy Ending。不過睇完覺得電影偏向Indie，主要討論性同愛的關係。電影的人物都好樸實，Joseph Gordon-Levitt 化身小鎮中無所事事的後生仔，只注重自己的身形、女人、性與信仰。Scarlett Johansson這等超級美女都淪為有公主病、管三管四的麻煩女友，極不討好。這段愛情關係一點都不浪漫，但勝在夠真。同時，那種在馬路上開車互罵、去教會當例行公事、翹實男朋友做Gym等情節，連帶比較鄉下、比較俗氣的用語都好American。(絕不是大家鍾愛的Hollywood Style)

電影結尾安排Joseph Gordon-Levitt 愛上做得佢阿媽的Julianne Moore，相信是刻意與Scarlett Johansson 象徵「性」的形象做強烈對比。不過個人不太鍾意。兩人一起的感覺好怪。

電影整體水準一般。故事沒有扭橋、平實、但有中心思想，拍攝略見個人風格、鏡頭同剪接都好有Pattern，令觀眾好容易感受到果種日復日毫無改變的人生進程。不過一閃碎Shots就眼花，閃得太快了。Joseph Gordon-Levitt 令我好驚喜，因為佢不甘只做一個荷里活型男影星。其實不止佢，每一個願意跳出Comfort Zone的創作人，每個勤力不自滿的藝人都好令人敬佩。希望佢不久將來再有新作吧!