《玩轉4字頭》(While We're Young)：做一個自己會喜歡的人

原來已經一年無打Blog，大概係轉工的後遺症。上年年中由電影Writer轉去做電影PR，最初都好唔習慣，花好多時間適應。跟住連續做2套港產片，忙完已經變左2015。幾個月來，每次睇到好睇的戲、去左個難忘的Trip、做到個好的Project，都會同自己講，今次真係要打番篇文，好好紀錄下啦！點知最後都係hea左佢。

近排又開始諗好多野，傳媒業拖左咁耐，終於都要改朝換代。正所謂牽一髮而動全身，其它行業自然都alert到危機，大家都開始變。
我嘅感覺，就係感概。



好似《玩轉4字頭》(While We're Young)入面所講的時移勢易、長江後浪推前浪咁。年輕時，堅持過成功過，之後一直忠於自己的信念去生活，點知一日失驚無神發現，自己果套已經無人buy，所謂的堅持、信念變得無價值。因為太堅持自己果套，Out左，仲要追唔番，唏唔唏噓?

近排聽到一個前輩，去左IN一個頗出名的網台，不過因為唔習慣人地的工作方式/文化(要夠快、夠爆多於深度同質素)，最後都無去做。依件事的潛台詞似係「不進則退」，又似講緊傳媒的生存空間愈來愈窄、但其實忠於自己的堅持，又有咩錯?
根本無對錯，分別只係後生同老，潮定OUT。
我並唔算處於行業轉變的危機當中，只係見到好多類似的Cases，有所感概。不理外在環境，其實我只想做一個自己會喜歡的人。

我一向都偏愛睇喜劇，仲要係正能量爆燈果隻：你夢想係前面，咪去跑去追，終有一日你會掂！罕有地，我會咁想推介依套現實殘酷的偽喜劇俾大家，可能我都開始(心境)老? 另外，有拍開野的朋友去睇應該會有更多想法，套戲探究埋電影的真實同假象，可以好好思考應該做一個點樣的Story Teller。